سیّد، اگر اول شمعه سنین یانمادی کؤنلون

ای مه، سنه بو آه دمادم نه اوچون دور،
آیینۀ دلده کدرو غم نه اوچون دور؟
باتدین گئنه بختیم کیمی بیلمم نه قرایه،
قربان سنه، بو شیوۀ ماتم نه اوچون دور؟
تجرید لطافتله سن عیس زامانسان،
عیسی یه، نگاریم، غم مریم نه اوچون دور؟
دنیایه گلن گئتمک اوچون دور، بو نه غم دیر،
بیر فکر ائله بو خلقت عالم نه اوچون دور؟
سیّد، اگر اول شمعه سنین یانمادی کؤنلون،
بس پردۀ چشمینده اولان نم نه اوچون دور؟