اگر من اول گول رخساره حسرت جان وئرم، سیّد

گهی چشمین، گه ابرو، گاه غمزن قصد جان ائیلر،
سالیر بیر فتنه، جانیم، قورخورام آخردا قان ائیلر.
گهی چشمین آلیر جان، تیر غمزندن توتار پنهان،
گهی غمزن تؤکر قان، چشم مستیندن نهان ائیلر.
ائدرلر خوبرولر قصد جان کؤنلوم فغانیندان،
جرس دن نئجه رهزن لر کی، قصد کاروان ائیلر.
کؤنول شوق روخوندن حلقۀ زلفونده ساکین دیر
او بولبول تک کی، هردم شاخ گولده آشیان ائیلر.
گر، ای سرو روانیم، باغ آرا ناگه خورام ائتسن،
قوپاریب باغبان سروین، سالیب سویه روان ائیلر.
اگر من اول گول رخساره حسرت جان وئرم، سیّد،
مزاریمدان چیخیب گول، اوندا بولبول لر فغان ائیلر.