قونشو تویوغو قاز گؤرونور قونشویا، سیّد

دهرین منه سنسیز بو باهاری نه گرک دیر؟
گولزار چمن صوت هزاری نه گرک دیر؟
آشفته کؤنول تار سر زلفوو ایستر،
سونبول منه سنسیز، سنی تاری، نه گرک دیر؟
عطر سرن زلفون منه مطلوبدور، ای گول،
عطارلارین مشک تتاری نه گرک دیر؟
هر گئجه کی، آغوش خیالیمدا دیر اول ماه،
ظاهرده اولان بوسو کناری نه گرک دیر؟
ای زاهد خودبین، یئری، اؤز عیبینه کور اول،
خلقین سنه بو عیب و اواری نه گرک دیر؟
بی بادۀ گولگون بیزی مست ائیله دی، ساقی،
مین بعد مئین رنج و خوماری نه گرک دیر؟
قونشو تویوغو قاز گؤرونور قونشویا، سیّد،
اؤز یاروی توت، اؤزگه نگاری نه گرک دیر؟