باغبان هر گونده بیر سروین قوپاردیر باغ دن

اولدو سونبول لر خجیل زلف پریشانین گؤروب،
غنچه‌لر قان اولدولار لعل دورفشانین گؤروب.
یوسفه زیندان تمنا اولدو مهریندن سنین،
عالم ذراتده چاه زنخدانین گؤروب.
باغبان هر گونده بیر سروین قوپاردیر باغ دن،
تا کیم، ای روح روان، سرو خرامانین گؤروب.
جوی لر تک اشک گولگونوم اولور هر یان روان،
الده چوکان، عرصه ده رخش اوزره جولانین گؤروب.
قوی اؤلوم، آخر نفس دیر، گلمه نشیم اوسته، تا
غیرلر مرگ ائتمه سین خواهش، بو احسانین گؤروب.
زخمینه مرحم تصور ائتدی تیر روستمی،
اشکبوس، ای قاشی یای، سینه مده پئیکانین گؤروب.
غنچه تک یوز پیرهن چاک ائتدی، ای گول، رشک دن
سیّد خونین جگر چاک گیریبانین گؤروب.