زلفونده گیزلنیب اوزوه یئتدی، عاقبت

تا دوشدو دل لره غم عشقین حکایتی،
دیوانه لیکده توتدو سؤزوم هر ولایتی.
دوشدوم او نوع دل لره دیوانه لیکده کیم،
منسوخ اولوندو دهرده مجنون روایتی.
عشق اولینده سرکش اولور تا زبون ائده،
صبر ائت کی، وصل یاردیر آنین نهایتی.
چوخ دان منی ائدردی زبون غصه، ساقیا،
گر اولماسایدی پیر مغانین عنایتی.
مندن زیاده شکوه ائدر اول دخی منه،
سندن کیمه ائدرسم، آ ظالم، شکایتی.
بیجا اوزون قارالمادی خط سیاه دن،
عشاق آهی نین بودور، ای سرو، آیتی.
زلفونده گیزلنیب اوزوه یئتدی، عاقبت
کفر ایچره تاپدی سیّد او نور هدایتی.