او زلف قاره قیلیب بختیمی، مگر سیّد

خوش اول زامان کی، قاپیندا گدالیغیم وار ایدی،
بو اعتبارایله بیر پادشالیغیم وار ایدی.
مکدّر ائتدی غبار حوادث ایله فلک،
شراب ناب کیمی دلگوشالیغیم وار ایدی.
شکست سرسر یاس اولدو، ای خوش اول گون کیم،
سفینۀ عمله ناخدالیغیم وار ایدی.
نه چئورمه دولانیرسان بو گون منیم، ای بخت،
هاچان سنینله منیم آشنالیغیم وار ایدی.
ریانی ترک ائلدیم، جام توتدوم، ای زاهد،
منیم ده ائل گؤزونه پارسالیغیم وار ایدی.
امامه مقتدییم، ای خوش اول زامانلار کیم،
شرابخوارلره پیشوالیغیم وار ایدی.
او زلف قاره قیلیب بختیمی، مگر سیّد،
منیم ازلده بو بخت قرالیغیم وار ایدی؟