سیّدین ظاهر اولوب شعر شکرباریندان

زلفوه ظلمت دوران دئدی لر، گئرچک ایمیش،
لبوه چشمۀ حیوان دئدی لر، گئرچک ایمیش.
او دهن فکری ایله جمله یوخ اولدو واریم،
دهنین نقطۀ پنهان دئدی لر، گئرچک ایمیش.
هر گلن آدم ائدر جان و کؤنول دن تصدیق،
کویوی روضۀ رضوان دئدی لر، گئرچک ایمیش.
آلیشیب، شعله چکیب سوز ایله یاندیم، گؤردوم،
هجروی آتش نیران دئدی لر، گئرچک ایمیش.
قاش لارین نون قلم، قددین الیف، زلفون لام،
اوزوی سورۀ قرآن دئدی لر، گئرچک ایمیش.
یئر و گؤی، ارش و ملک نوروه ائیلر سجده،
سنی کیم، عالمه سلطان دئدی لر، گئرچک ایمیش.
سنما، سنده تجّلا ائله‌ییب حضرت حق،
صورتین صورت رحمان دئدی لر، گئرچک ایمیش.
حسنوه عاشیق اولان اولدو ملک دن اعلا،
منکر فضله و شیطان دئدی لر، گئرچک ایمیش.
سیّدین ظاهر اولوب شعر شکرباریندان
لب لعلین شکریستان دئدی لر، گئرچک ایمیش.