سیّدین نقطه جه یوخ عقلی، نه نادان گؤرونور.

اول ایکی زلفده رخسارۀ جانان گؤرونور،
گئنه خورشید بو گون داخیل میزان گؤرونور.
دوشمه ین عشقه نه بیلسین کی، ندیر مشکلوموز،
آری، غم چکمه ینه غم یوکو آسان گؤرونور.
سنسیز، ای گول، گؤزومه موسم هجرانیندا
گر گولوستانه باخام خار مغیلان گؤرونور.
دهنین بیر سر مودور، بونا سؤز یوخ، اما
بیر معمادی کی، یوز نکتۀ پنهان گؤرونور.
گؤرونور زلفون آراسیندا مه رخسارین،
شکر لیلله کی، گئنه کفرده ایمان گؤرونور.
نئجه من باده ایچیم لعل لبیندن آیری،
سنسیز، ای گول، مئ گولگون گؤزومه قان گؤرونور.
دور رخساروی توتموش گئنه اول زلف سیاه،
عجبا، بیر ملکه یار ایکی شیطان گؤرونور.
دهنین سرّینی سوردوم – دئدی، یوخ دان نه دئیم،
سیّدین نقطه جه یوخ عقلی، نه نادان گؤرونور.