سیّد، دخی بو طالع الیندن نه شکایت

شکر ائیله، کؤنول، صحبت جانانه یولون وار،
ای طوطی شیدا، شکریستانه یولون وار.
محروم دئگیلسن هله کوییندن او شوخون،
ای بولبول شوریده، گولوستانه یولون وار.
ای سبزۀ خط، سن کی لب یاره یئتیشدین،
بیر خیضرسان، اول چشمۀ حیوانه یولون وار.
ای شانه، بو کؤنلوم کیمی صدچاک نئچینسن،
اول سلسلۀ زلف پریشانه یولون وار؟
بو بی سر و پادن نیه بیدادوی کسدین،
ای شوخ، سنین کیم، بئله احسانه یولون وار؟!
بو اولفت ظاهردن اگر منع اولورسان،
قربانین اولوم، اولفت پنهانه یولون وار
سیّد، دخی بو طالع الیندن نه شکایت،
ای مور، سنین بزم سلیمانه یولون وار.