منو
صبر ایله دئدین، وصله علاج اولمادی، سیّد
ای باد صبا، کوی حبیبه گذر ائیله،
حال دل زاریمی او شاهه خبر ائیله.
غربتده پریشانلیغیمی زلفو غمیندن،
طول ائیله‌مه، اول سرو قده مختصر ائیله.
آخر من زاری در دلبردن آییردین،
ای چرخ جفاجو، منی آز دربدر ائیله.
آه سحریم قوبۀ افلاکه اوجالدی،
بو ناوک خونریزدن، ای گول، حذر ائیله.
اگلشمه یه تا خاک رهی دیدۀ غیره،
ای گؤز، تؤکوبن اشک غبارینی تر ائیله.
بسدیر منه بو تلخیگ هجران، لبیندن
گئت اؤزگه‌لرین کامینی سن پرشکر ائیله.
صبر ایله دئدین، وصله علاج اولمادی، سیّد،
رفع ائتمگه بو فرقتی فکر دیگر ائیله.