سیّد سرگشته زلف پرخمین دوستاغیدیر

ای ملک سیما، جمالین رشک جنّت باغیدیر،
قامتین توبا، لبین گویا کی، گول یاپراغیدیر.
جسم زاریم اشک چشمیمدن پوزولسا نئی عجب،
تئز تاپار رخنه، بلی، بیر یئر کی، سو اویناغیدیر.
لشکر غم کؤنلومون ملکینی ویران ائیله دی،
پادشاهیم، بیر ترحم قیل، مروت چاغیدیر.
واعظا، تقریر قیلما چوخ دا روز حشردن،
عاشیق اوچون روز محشر یارین آیریلماغیدیر.
هر یئتن شوخ جفاپیشه منه، ائیلر سیتم،
بو بلا چکمیش وجودوم خوب لر تاپداغیدیر.
لاله‌لر کیم، باش وئریب خاک مزاریمدان چیخار،
فرقتیندن چکدیگیم سینه مده حسرت داغیدیر.
لطف ائدیب بیر گون نولور سورسان پریشان حالیمی،
سیّد سرگشته زلف پرخمین دوستاغیدیر.