سیّد، روموز عشقده سن ده چیخارتدین آد

عاشیق اگرچی یاری گؤروب کؤنلو شاد اولور،
اما کی، چرخ جور و ایله نامراد اولور.
مانع اولوللار عاشیقه کیم، مهری آز اولا،
غافل کی، منع اولسا محبت زیاد اولور.
شدت ائدینجه منع اولور سوز دل فزون،
دریاده موجه باعث اولان توند باد اولور.
زایل اولورمو پند ایله عاشیق دن عشق یار،
دامن چالاندا شعلۀ نار ایزدیاد اولور.
بازار حسنه عاشیق مسکیندی مشتری،
عاشیق کی یوخدو، حسن متاع کساد اولور.
مشهور قیلدی عشق زولئیخا او یوسفی،
عاشیق ده حسن شهرتینه ایجتیهاد اولور.
سیّد، روموز عشقده سن ده چیخارتدین آد،
تا کیم، زمانه وار، سنه عشق ایله آد اولور.