زلف پر تابوا قربان تن زاریم، بری باخ.

دولانیم باشوا، ای نازلیجا یاریم، بری باخ،
عیشوه لی، غمزه لی، چم خم لی نگاریم، بری باخ.
عیشوه آغاز قیلیب صبریمی تاراج ائلمه،
گئتدی دلدن دخی آرام و قراریم، بری باخ.
خم یئمیش قامتیم ابرولریون قربانی،
زلف پر تابوا قربان تن زاریم، بری باخ.
بو جفادیده دل اول کاکیل میشکینه فدا،
گؤزلرین صدقه سی بو جسم فیکاریم، بری باخ.
جان نثار ائتمگه آمعددی سیّد، گؤزلیم،
گر دئسن لطف ایله: ای عاشیق زاریم بری باخ!