بولبول اوصاف روخون قیلدی مگر گولشنده

نولا دل بیلمه سه رمز روخ جانانی درست،
کیم دیر اول کس کی، بیله معن قرآنی درست.
سونبول زلفون او گول ائتسه شکسته اوزونه،
قالماز اهل وره ین دین ایله ایمانی درست.
بولبول اوصاف روخون قیلدی مگر گولشنده،
قالمادی باغده بیر غنچه گیریبانی درست.
غنچه نین کؤنلو بوتون، لیک یوخ عهدینده وفا،
بولبولون قلبی سینیق، ائتدیگی الحانی درست.
دورا بیلمز اوزوه ماه مقابل بیر گون،
آیدا یوز دفعه اگر کیم، اولا نقصانی درست.
بیر گئجه حسنوه اوخشاتدی اؤزون آی، اودو کیم،
ائله بیر یعنی شکسته اولو، بیر یعنی درست.
دئمه، سیّد، کی شکست ائیله‌دی پیمانینی یار،
هیچ بیر یار اولورمو اولا پیمانی درست؟!