منو
خوار ائیله‌دی اول گول سنی اغیار یانیندا
من ائیله بیلیردیم کی، منه یار اولاجاقسان،
عالمده منه یار وفادار اولا جاقسان.
من ائیله خیال ائتمیش ایدیم ای گول رعنا،
سربسته اولان غم لره غمخوار اولا جاقسان.
اوّل ائله‌ییب مهر و محبت منه، آخر
مندن، نه بیلیم کی، بئله بیزار اولا جاقسان.
روشن ائله‌دیم شمع جمالین، نه بیلیم کی،
اغیاره گئدیب شمع شب تار اولا جاقسان.
دیل وئرمز ایدیم من سنه، ای یار دل آزار،
بیلسیدیم اگر بئیله دل آزار اولا جاقسان.
سرمست مئی حسن و صفاسن حله، ای گول،
اول وقت کی، حسنون گئده هوشیار اولا جاقسان.
مغرورسن، ای گول، خبرین یوخدور اؤزوندن،
ایام خزان گلسه خبردار اولا جاقسان.
بیر وقت اولا جاق دیر کی، سن، ای یوسف ثانی،
عشاق سیه بخته خریدار اولا جاقسان
خوار ائیله‌دی اول گول سنی اغیار یانیندا،
سیّد، حله بوندان داخی سن خوار اولا جاقسان.