نورو آرتیب چشمیمین باشیم فلک لردن کئچر

بیرده گؤرسم، گؤز آچیب، گر اول گول رعنا یوزون،
گؤرمک ایسترسم، گؤزوم چیخسین اگر دنیا یوزون.
عشقده صنعان اولوب، زنّاره ائتمزمی هوس
گؤرسه زاهد گر سنین تک بیر بت ترسا یوزون.
خال و خاطّین عکسی چشمیمده جمالین شوق دن
خیل هیندودور کی، روم اوچون توتوب دریا یوزون.
داغه چالدی جان شیرین نین قورتاردی کوهکن،
شور اشکیم سیل تا گؤردو توتوب صحرا یوزون.
نورو باتسین چشمیمین گؤرمک تمنا ایله سم
ماه رخسارین قویوب مهر جاهان آرا یوزون.
اوز سورورلر بونجا کیم، عشاق خاک پایوه،
اوز چکیب، ای ماه روخ، گؤسترمه استغنا یوزون.
نورو آرتیب چشمیمین باشیم فلک لردن کئچر،
بیرده گؤرسم، سیّد، اول ماه ملک سیما یوزون.