شکر، سیّد، گئدیرم کام دل ایله بو سفر

چیخیبان شهردن، ای ماه، جگرقان گلدیم.
بو سفردن تاپیبان آی کیمی نقصان، گلدیم.
حسرت سلسلۀ زلف پریشانین ایله
پیچ و خم لر چکیب، ای شوخ، پریشان گلدیم.
سانما کیم، ابر سیه دن تؤکولوردو باران،
من ایدیم، ای گول رعنا، گؤزو گریان گلدیم.
نه اوچون وئرمه‌میشم وصل گونو جانی سنه،
گرچی گلدیم، بو خیال ایله پشیمان گلدیم.
یوخدو بیر کیمسه کی، غمده ائده حالیمی سوال،
من بی دل کی، بئله بی سر و سامان گلدیم.
مور آواره ایدیم، دامن صحرانی گزیب،
بیلدیم آقابگی عالمده سلیمان، گلدیم.
شکر، سیّد، گئدیرم کام دل ایله بو سفر،
گرچی بو درگهه هر سال فراوان گلدیم.