ملک جاهاندا، سیّدا، خاتم عاشیقان منم

قاشوا ائیلرم نظر، فکر هلاله دوشموشم،
عید وصالین ایسترم، میل جماله دوشموشم.
کوکب بختیمین کسیب راهینی نحس یولدوزو،
ای مه بدر، قیل نظر، گؤر نه وباله دوشموشم.
گلمه‌دی آفتابیمیز، کئچدی ناهار نصف دن،
گؤر کی من، ای فلک، بو گون بیر نه زواله دوشموشم.
دون دئمیشم دهانوی نقطه، ولیک، یوخ یئره
نکته شوناس لر آرا قیل و مقاله دوشموشم.
دون اولوب اؤزگه نحو ایله عمر زمان مازیده،
حالیما ایندی حالی اول، بیل کی، نه حاله دوشموشم.
عاشیق اولوب دهانوه حلقۀ ”میم”ه دؤنموشم،
زلفوه اشتیاق ایله صورت ”دال”ه دوشموشم.
سرّ دهان یاری من ایسته ییرم، شعور یوخ،
ساندیم عدم وجود اولور، فکر محاله دوشموشم.
جان وئریب آلماق ایسترم بوسه دهان یاردن،
بو یوخ و واردن کئچیب، گؤر نه خیاله دوشموشم.
ملک جاهاندا، سیّدا، خاتم عاشیقان منم،
نقطۀ اوّلم، ولی، نوبه ده داله دوشموشم.