منو
سرشک چشم تؤکوب آغلایار اوچون، سیّد
نولایدی بزمیمه اول گولعذار بیر ده گله،
شکوفه‌لر آچیلیب، نوباهار بیر ده گله.
عیادت ائتدی، من نیم جان شفا تاپدی،
نولا عیادتیمه اول نگار بیر ده گله.
خدنگ و تیغ و سنان و کمند ایله اول شوخ،
الینده قتلیم اوچون هر چهار بیر ده گله.
ایچه شرابی او روح روان، اولا مخمور،
او مست گؤزلره تازه خومار بیر ده گله.
نولا باهار گلیب آچیلایدی باغده گول،
بو باغه بولبول بی اختیار بیر ده گله.
نهانی غمزه‌لری جانیم آشکار آلدی،
نولور او گنج نهان آشکار بیر ده گله.
سرشک چشم تؤکوب آغلایار اوچون، سیّد،
بو آرخا سو گلیب، امید وار بیر ده گله.