قان ائدیب دیر، دل عشاقی خیال دهنین

ای خیضیر، ظلمت زلفو سنه آسان اولماز،
دهن یار کیمی چشمۀ حیوان اولماز.
حسنه موقوف دئگیل، یار گرک حال اهلی،
چوخ اولور یار، ولی یار زباندان اولماز.
صید قیلماز دل عشاقی، کؤنول، کاکیلو زلف،
هودهودون تاجی اگر اولسا، سلیمان اولماز.
قان ائدیب دیر، دل عشاقی خیال دهنین،
آفتابیم، لبوی لعل دئسم قان اولماز.
خلق ائده عاشیق اوچون خالق اگر یوز فیردوس،
بو یقینیمدی کی، اجر شب هجران اولماز.
زاهدا، ائتمه منیم کؤنلومه ایمان تلقین،
کافر عشقدی بو، هیچ مسلمان اولماز.
سنه حدسیز اولور، ای شوخ، منیم تک عاشیق،
منه بو عالم آرا سن کیمی جانان اولماز.
ظلمت شب دن اوساندیم، ای الین قربانی،
سینه نی آچمایاسان، صبح نمایان اولماز.
حسن سلطانی سنین کیمی تاپیلماز هرگز،
سنه سیّد کیمی بیر بندۀ فرمان اولماز.