بو روشده هانی بیر سروده مضون رفتار؟

سؤیلدیم یاره کی، ای مه، گلیب ایام باهار،
گولدو ناز ایله کی، بیلمم یئنه بو سؤزده نه وار.
دئدیم: ای مایۀ جان، گولشن و صحرا دمیدیر
کی، گول و لاله یه پیرایه قیلیر باد باهار.
پرده دن چیخدی یئنه گولشن آرا شاهد گول،
قالمادی خاطر بولبولده داخی صبر و قرار.
سونبولون توره سینی شانه قیلیب باد سحر،
کوه و صحرالاری هر لحظه قیلیر قالیبار.
دشت آرا غلغلۀ قمری و سار و سلسل،
نرگسین آچدی گؤزون خواب دن ائتدی بیدار.
لاله دولدوردو مئی ژاله ایله جامینی کیم،
باغ شاهدلرینی قویمایا بیر دم هوشیار.
بیر طرف تار و دف و های و هوی ساده پرست،
بیر طرف نای و نئی و نقل و مئی باده گوسار.
قاریشیب بیر بیرینه شیخ و مرید و مرشد،
صحن گولزاری قیلیر سئیر، چیخیب خورد و کوبار.
دئدی: ای عاشیق دلسوختۀ خام طمع،
بئله بیهوده خیالاتدن ائت استغفار!
عاشیق زاره بو لازیمدی تماشای چمن،
طالب یاره نه حاجتدی هوای خس و خار؟
ایسته سن لاله وگول، قیل رخ عالیمه نظر،
ائیله سن مئیف چمن، ائت سر کوییمه گذار.
غنچه نی ائیله تصور کی، دهانیم کیمیدیر،
لیک یوخ غنچه ده هرگز بئله شیرین گفتار.
سونبول و توت کی، سر زلفومه بنزر، اما،
باغلیدیرمی اونا زلفوم کیمی یوز مین دل زار؟
هانی زلفوم کیمی سونبول، هانی روییم کیمی گول،
هانی گولده بو طراوت، هانی سونبولده بو تار؟
اولا بیر یئرده کی، زلف سیهیم نافه گوشا،
نه روا دیر کی، ائده عرض مطاعین عطار.
نرگیزی توت کی، به عینه، ائله، بنزر گؤزومه،
هانی نرگیزده بو غمزه، هانی اوندا بو خومار؟
توتالیم کی، قد مضونوما خود بنزر سرو،
بو روشده هانی بیر سروده مضون رفتار؟