آفرین لر، سیّدا، روح فصاحت، آفرین!

آفرین، ای اهل سنت والجماعت، آفرین!
ای ائدن لر خلقه اظهار سخاوت، آفرین!
وار ایمیش سیزده حمییت، ای گروه باوفا،
بینوالر خیلی نی ائتدیز حمایت، آفرین!
پول ییغیب ائتدیز زکات ایله غنی مفلس لری،
وار ایمیش سیزلرده آثار ذکاوت، آفرین!
ایکی مین اوچ یوز نفوسون رزقینه ضامن اولوب
ائیله دیز ارزاق محتاجه ضمانت، آفرین!
متصف اولدوز صفات رب رزاق ایله سیز،
ائیله دیز ایطام و مسکینه کفالت، آفرین!
پول ییغیب، بوغدا آلیب توتدوز الین مسکین لرین،
آج قالانلار تاپدی گؤر کیم، استراحت، آفرین!
صدر مجلس دن بوروز ائتدی بو تدبیر ثواب،
آفرین، ای مصدر عزت، صدارت، آفرین!
آدام و حوانی بو بوغدا ایلن شاد ائیله دیز،
باغ جنّت تاپدی بو ایشدن خسارت، آفرین!
آدمین اولادینا بوغدا ایله ائتدیز کمک،
قویمادیز اول حضرتی چکسین خجالت، آفرین!
چیخدی جنت دن یئییب بوغدا بابامیز چون بیزیم،
ائیله دیز بوغدایه سیز یاخشی سیاست، آفرین!
بیر نئچه آنبارلرده بوغدا اولموشدو نهان،
تاپدیز اول بوغدانی، ای اهل رشادت، آفرین!
آدمین اولادینا وئردیز دییرمانلار آرا،
ازدی لر اون تک اونو، تاپدی خسارت، آفرین!
ائتدی لر تننورلرده بره تک بریان اونو،
قیلدیلار بوغدایه اظهار عداوت، آفرین!
آتش فقری ماساکینه گولوستان ائیله دیز،
اییه سین سیزدن خلیل الله فخارت، آفرین!
حق تعالی راضی اولسون سیزدن، ای اهل سخا،
قویمادوز چکسین دول عورت لر اهانت، آفرین!
بو باهالیق ایلده، بو شدتلی سرما گون لری
گرم ائدیب مسکین لری ائتدیز عیانت، آفرین!
امپراطور معظم ائیله‌میشدی هم کمک،
چوخ رعیت خاطرین ائتدی رعایت، آفرین!
توتدو مسکین لر الین احسان بی پایان ایله،
آفرین، ای شاه اقلیم عدالت، آفرین!
اللی ایلده بؤیله ایل عالمده بیر دفعه دوشر،
ائتدیز، ای ارباب همت، رفع عسرت، آفرین!
صاف میلاد ایله یازدیم بو ایلین تاریخینی،
تا مسیحادن بیزه اولسون کرامت، آفرین!
بیر جیداوو ایکی مُحمَل صفر اونون تاریخیدیر،*
آفرین لر، سیّدا، روح فصاحت، آفرین!
——————————————–
* تاریخ میلادی ۱۸۸۰ جی ایلدیر.