فرهاد میرزه یه

فرهاد میرزه یه

ای کؤنول، بیر مژده وئر کیم، جسمه اوندان جان گلیر،
جان چیخار شوق ایله استقباله کیم، جانان گلیر.
بو هامان فصل همایون دور چیخیب میزاندن،
برج عقرب سئیرینه خورشید نور افشان گلیر.
برج میزاندان گلن خورشید رخشان دیر و یا
ساحت ایراندان شاه فلکفرمان گلیر.
یا سلیمان دیر بساط اوزره و یا کنعاندن
عرض دیدار ائتمه یه مصره مه کنعان گلیر.
وئردی لر دون مژده کیم، مهروسۀ تهراندن
ساحت قافقازه بیر شاهزادۀ دوران گلیر.
خسرو شیرین زبان فرهاد میرزه کیم، بو گون
شکّر مدحیله طوطی تک منه الحان گلیر.
باغلاییب دیر کعبۀ مقصوده احرام صفا –
کیم، مینای عشقده ذبح ائتمه یه قربان گلیر.
ظل حق دیر ناصرالدین شه، بو آنین سایه سی،
سایۀ سلطاندا مضمر سایۀ یزدان گلیر.
اهل اسلامی سرفراز ائتمه یه هر صفحه ده
لطف حق، برهان مطلق، آیۀ قرآن گلیر.
لطف ایله فیض قودومیندن بو رضوان بارگاه
ائتمه یه روسیه ملکون روضۀ رضوان گلیر.
حبّذا، ای دولت روسیه، فخر ائت کیم، سنه
بیر همای اوج استغنا بو گون مهمان گلیر.
صیت عدلیله بو گون مملو ائدیب افاقی کیم،
سؤیله ییرلر تازه دن شیروانه نوشیروان گلیر.
بیستم ماه سیامی عید شوال ائت، کؤنول –
کیم، بو گون شیروانه اول مهر و زحل دربان گلیر.
من دئمزمیدیم، کؤنول، غم چکمه درد فقردن –
کیم، اولور بیر گون کی، آخر دردووه درمان گلیر؟
من دئمزمیدیم کی، قالماز چوخدا بیژن چاه دا،
قورتاریرسان غصه دن چون رستم دستان گلیر؟
دایم اولماز صفحۀ عالمده کیوان جلوه گر،
مشتری اقبال ائدیر، اول کوکب رخشان گلیر.
دایم اولماز شاهدان باغ بهمندن تباه،
آچیلیر گولشنده گول لر، موسم نیسان گلیر.
دایم اولماز یوسف کنعانه قحط مشتری، بیر عزیز
مصر اولور پیدا، شه سامان گلیر.
شکرلله، گلدی بیر شهزادۀ والا گوهر –
کیم، سخاسین گر گؤره حاتم، گؤزوندن قان گلیر.
ای فلک چاکر کی، هر گون درگه افضالوه
ال آچیب سایل لییه یوز حاتم و نعمان گلیر.
سنسن اول خاقان گوهر کیم، مطبغ احسانوه
کاسه الده چیندن فغفورایله خاقان گلیر.
گر سنی قیصر دئسم، واردیر قصوری نظمیمین،
گر سنی کسرا دئسم، البته کسر شأن گلیر.
گر دئسم خورشید رخشان سان، زوالیم وار منیم،
گر دئسم ماه فلکسن، سؤز منه نقصان گلیر.
بیلمیشم، ای مظهر اسماء حُسنا کیم، نه سن،
گرچی فکر بی کریمه هر لحظه بیر عنوان گلیر.
عالم ناسوت اوچون قوس نزولین طی ائدیب،
صورت انسان ایله دنیایه بیر رحمان گلیر.
ای ریاضی علمی نین عالم آرا اقلیدی سی،
مکتب تعلیموه درس آلماغا لقمان گلیر.
وئرسه‌لر احبابوه گر زهر لطفوندن سنین،
زهر قاتودن خواص چشمۀ حیوان گلیر.
دوشمه نین گر آب کوثر ایچسه گویا زهر ایچر،
دیدۀ بدخواه ووه باغ جنان نیران گلیر.
سرورا، عالی نژادا، شاه گردون رفعتا،
ای کی، وصفیندن تن افکاره هر دم جان گلیر.
موسم احیاده گلدین خطۀ شیروانه سن،
مرده‌لر احیاسینا حق دن بو گون فرمان گلیر.
بار ایلاها، بو سفر اولسون مبارک کیم، سنه
بو سفردن بوی خیر، ای شاه ظل احسان، گلیر.
یاوریم اول، قیل بو گون لطفونله احیا سیّدی –
کیم، سنه محشر گونو یاور شه مردان گلیر