عالم بی عمل واقعه سی

عالم بی عمل واقعه سی

بیر نفر مرد گئتدی تحصیله –
کی، یئتیرسین علومی تکمیله.
نئچه ایللر کی، قالدی غربتده،
اولدی اوقاتی صرف عشرتده.
نه کتاب و نه درس و نه تکرار،
عیش و عشرتده قالدی لیل و نهار.
علمدن بیر شئی ائتمه‌ییب حاصل،
وطنه گلدی عالم جاهل.
او زامان کیم، وطنده قایم ایدی،
بینوا بوندان آرتیق عالم ایدی.
گلیبن خلق، بعد حمد و ثنا
ائتدی لر التماس، کئی مولا،
نئچه ایللردو ای امام کبیر،
یولوا گؤز دیکیب صغیر و کبیر،
جمع اولوبدور بو دم وضی و شریف،
مسجد جامعه گتیر تشریف.
بیزه اوچ گون گرکدو وعظ ائده سن،
رسم و آداب شرعی اؤیره ده سن.
محشر احوالینی بیانه گتیر،
قلب لر کیم، اؤلوبدو – جانه گتیر.
گؤردو کیم، ازدحام ائدیب دیر عوام،
ائدیبن مسجده او دمده خرام،
دوروبان باشه قویدو عمامه،
گیئدی نعلینینی او علامه.
گلدی مسجدده اولدی پیشنماز،
ائتدی بعد نماز راز و نیاز.
عرصۀ منبر اوسته توتدی قرار،
ائدر آواز، کئی اولول ابثار!
سیز بیلیرسیز ایا گروه فقیر؟
دئدی لر:– بیلمیریک، ائله تقریر.
بیلمین چون، دئدی، ائدیم نه بیان؟
ائدیبن قهر، دوشدی اولدی روان.
یئنه فردا ائدر او قومه خطاب –
کی، بیلیرسیز، ایا گروه دواب؟
دئدی لر کیم، بلی، ایا مولا،
بیلیریک، ای امام ارض و سما!
دئدی کیم، بس بیلیرسیز، ای بی پیر،
داخی بیجا نه ائیله ییم تقریر؟
یئنه دوشدی آشاغه منبردن،
گئتدی اول نایب امام زمن.
یئنه فردا ائدر او قومه خطاب –
کی، بیلیرسیز ایا گروه لوباب؟
دئدی لر:–نصفیمیز بیلیر، امّا
نصفیمیز بیلمیر، ای امام هودا.
دئدی کیم، اول بیلن گروه الیم
ائیله سین بیلمه ین لره تعلیم.
دئدی لر مرحبا بو گفتاره!
بودو سؤز، درده ائیله دین چاره.
علمی بیر کلمه ده تمام ائله دین.
چارۀ درد خاص وعام ائله دین.
سن تکی اولسا عالم و فاضل
بیزی هر مطلبه ائدر واصل.
حق تعالی وئریب کمال سنه،
آلدیغین پول اولاحلال سنه!