جاهل آتا ایله عالم اوغول حکایتی

جاهل آتا ایله عالم اوغول حکایتی

بیر توانگر عوام دریا دل
گؤندریر اوغلون علم ائده حاصل.
هر ایل ارسال ائدیر مصارفینی،
تا کی کسب ائیله سین معارفینی.
اون بئش ایل اصفهاندا اول هوشیار
ائیله‌ییب کسب علم لیل و نهار،
یئتیریر جمله علمی اتمامه،
فضلی مشهور اولور چو علامه.
حکمتین اوّلینجی لقمانی،
خاصه حکمتده یوخ اونا ثانی.
تا کی ائیلر مراجعت وطنه،
بلبل آسا گلیر کوهن چمنه.
بیر گون اوندان ائدر آتاسی سئوال –
کئی گؤزوم نورو، ای حمیدخصال،
نئچه ایللردو چکمیشم زحمت،
قالمیشام گول جمالوه حسرت،
سنه گؤندرمیشم هر ایل چوخ پول،
اوغول، آز قالمیشام اولام یوخسول،
دئ گؤروم، مطلبه اولاق واصل،
هانسی بیر علمی ائتمیسن حاصل؟
دئدی:– ای باعث حیاتیم آتا،
ای رضاسی اولان نجاتیم آتا.
سن اؤزون بیر عوام امّی سن،
بو سئوالیندی غیر مستحسن.
من نه دلجن سنه بیان ائله ییم،
من نئچه علمیمی عیان ائله ییم؟
دئدی:– فی الجمله قیل بیان علوم،
تا گؤروم سنده واردی بیر معلوم؟
دئدی:– هیئت من ائتمیشم حاصل،
سنه بوندان نه شئی اولور واصل؟
دئدی:– هیئت دئمک ندیر یعنی،
دئ گؤروم هیئته ندیر معنی؟
دئدی:– هیئت ائدر بیان نجوم،
سنه فی الجمله ائیلرم معلوم.
چون اولور شمس داخل سرطان،
اولور عالمده فصل تابستان.
جدیه داخل اولاندا مهر منیر
زمهریر عالمه ائدر تأثیر.
بو سیاقی الینده توت برهان،
بیلوسن یای هاچانی، قیش نه زامان.
دئدی:– ای بی کمال، اون بئش ایل
گئدیبن ائتمیسن بونو حاصل؟
حیف او زحمت، منیم او سرمایه م،
سن بیلن علمی هم بیلیرم . .
ساللانیر یایدا، آننارام یایدیر،
ییغیشیر قیشدا، زهلی بیر یایدیر.
شرمناک اولدی عالم دانا،
او صفت علمدن بودور معنا.