مجتهدین تحصیل دن قایتماسی

مختصر، بیر زامان چیخار بو خبر –
کی، گلیر اول جهان فضل و هنر.
پیشوازه چیخار صغیر و کبیر،
اوجالار عرشه نالۀ تکبیر –
کی، بو گون نایب امام گلیر،
ائیله‌ییب علمینی تمام گلیر.
یئربیئردن او قوم نیک صفات؛
اوزونو گؤرجیین چکر صلوات.
تؤکولور خلق سول و ساغیندان،
اؤپه‌لر تا کی ال آیاغیندان.
احترام ایله شهره وارد اولور،
یئددی گون مجلسی دولور، بوشالور،
کسیلیر هر طرفده قربانلار،
آچیلیر باب لطف و احسانلار.
نئچه ایام اولور ضیافت لر،
ائیله ییر اهل شهر دعوت لر.
فکر ائدیر کیم، او قوم فرزانه
مجتهدچون گرکدی بیر خانه.
بیرده گؤردون کی، ائیله‌ییب تدبیر،
بیر گؤزه ل خانه ائتدی لر تعمیر.
یئنه سؤیلر او قوم دانش ور،
مجتهدچون گرکدی بیر همسر.
بیر گؤزه ل قیز نکاح ائدیب آنه.
ملکی عقد ائدیلله شیطانه.
تا کی مقصودونا یئتیشدی امام،
مسجده ناز ایله ائدر اقدام.
اؤزونه اوّل ائیله یر زیور،
بیر گلین تک کی آختاریر شوهر؛
گؤزونو سورمه دن ائدر مکحول،
بیر زامان زینته اولور مشغول.
اوزونه ائیله یر گلاب افشان،
بارماغیندا نگین لعل نشان.
باشنا دوردی قویدو عمامه،
گیئدی نعلینینی او علامه.
وار بوغازیندا سخت تحت الحنک،
او قدر برک چکیب اولوب دؤینک.
چینینه سالدی بیر لطیف عبا،
الینه آلدی بیر ظریف عصا.
باشدا عمامه، ساققالیندا حنا،
بارماغیندا اوزوک، الینده عصا.
وار آیاغیندا جفت نعلینی،
بیل کی پیغمبرین بودور قئینی.
ساغ سولوندا قالیبدی چشمی مدام –
کی، گؤرک کیم وئریر امامه سلام.
بو گون ائودن چیخیب نمازه گلیر،
سوفی و صافی پیشوازه گلیر.
مسجده ناز ایله اولور داخل،
گیردی محرابه عالم و فاضل.
اویدولار خلق، امام قیلدی نماز،
ائتدی مین گونه حَقه راز و نیاز.
ائدیبن تا نمازینی اتمام،
منبره وعظ ایچون ائدر اقدام.
منبر اوستونده اول فلک رفعت،
اوخور آهسته بیر اوزون خطبت.
خطبه دن سونرا بیر گؤزه ل آیه،
اولور اول خوشزبانه سرمایه.
کئی یوالناس، سرّدیر بو دقیق،
حکمتی شرعه ائتمیشم تطبیق.
صدریم اولموش وصی دریادن،
فضلیم آرتیقدی موللا صدرادن.
بحر علمیمده، ای گروه بشر،
پاک اولان گوهر مراده، یئتر.
یازمشام سربسر فروعاتی،
آچمیشام غامزات آیاتی.
کهنه تفسیره وئرمیشم تغییر،
تازه دن یازمشام اؤزوم تفسیر.
بیر نئچه سهو ائدیبدی بیضاوی،
اولموشام جمله اونلارا حاوی.
فخر راضی قرین راز دئیل،
یازدیغی رمزلر تراز دئیل.
ائیله‌ییب سهو صاحب “تیبیان”،
روح دن بی خبردو “روح بیان”.
ائتمه‌ییب فتح موللا فتح الله،
سهو واضح یازیب دیر اول گمراه.
گاه فلک، گاه عرش دن دانشیر،
بو صفت چوخ چرن پرن دانشیر.
طمطراقین گؤرور او قوم عوام،
سؤیلییرلر کی، ائتمیش علمی تمام.
بو فلان مجتهددن اکمل دیر،
شیخ الاسلامدن بو افضل دیر.
لیک بیر پاره مرد دانشور
آنلاییب دیر کی، کده وار نه خبر.
بوش دغار اولدیغون بیلیب درحال،
خوف دن لیک نطقین ائتمیش لال.
بیر دئین یوخدور، ای امام شریر،
ائده جکسن نه وقتدک تزویر؟
توتالیم علمه اولموسان واصل،
بیزه بو علمدن ندیر حاصل؟
هانسی نادانی عالم ائتدین سن؟
هانسی بیماری سالم ائتدین سن؟
هانسی کوری سن ائتمیسن بینا؟
هانسی امواتی ائیله دین احیا؟
هانی اسلام ایچون سرانجامین؟
یئره گیرسین او مجتهد نامین!
سؤیلدین تلگرامی علم بلیس –
کی، اونی اختراع ائدیب ابلیس.
کار شیطان دئدین دمیر یولونو،
خلقه ائتدین حرام “دوم” پولونو.
خاچ پرست لر تمام دوشدی قاباق،
تؤکولوب دالدا قالدیق، آی سارساق!
آلدی اهل کتاب دنیانی،
شرح ائدیرسن سن ایندی قرآنی؟!
اهل اسلام اولدی خوار و ذلیل،
باعثی سن سن، ای امام جلیل!
سن بیزی نفعه ائتمدین واصل،
باری قوی اؤزگه علم ائدک حاصل.
بیزی بسدیر بو قدر آلداتدین،
دینی دیناره هر زامان ساتدین.
سن بیلن علمی بیلمه ین یوخدور،
سندن اعلم اوشاقلار چوخدور.