منو
سیچانلارین پیشییه هدیه آپارمالاری
سیچانلارین پیشییه هدیه آپارمالاری
چونکی سیچانلار بو سؤزو ائتدی گوش،
گئتدی فرح دن هامی دان عقل و هوش.
سؤیله‌دی لر بس اونا انعام ائده ک،
تحفۀ لایق اونا اکرام ائده ک.
یئددی سیچان ائیله‌دی لر انتخاب،
هر بیری بیر خسرو مالک رکاب.
گر بیری بیر طایفه یه کتخدا،
هر بیری بیر کشتی ایچون ناخدا.
هر بیری سی باشه آلیب بیر طبق،
گون کیمی هر یانه سالیردی شفق.
پیش کش و تحفۀ الوان لر،
تازه فتیر، یاغ لی اولان نان لر.
برۀ بریان و پنیر و کباب،
فیرنی و دولما و جیر، هم شراب.
مثل غلامان در پادشاه،
مدح کنان، نکته سرا، عذرخواه،
مسجده گلدی، هامی سی چکدی صف،
گؤردو بونو عابد صاحب شرف.
ائیله‌دی لر جمله سلام و ثنا،
سؤیله‌دی لر عجز ایله:– ای پارسا،
گرچی بولار طرفه بضاعت دئیل
پیش کش لایق حضرت دئیل،
سن کرم لطف ایله ائیله قبول.
رد ائلمه بیزلری خاطر ملول.
چونکی پیشیک گؤردو بو کیفیتی،
ناز و نعیمی، او گؤزه ل نعمتی،
سؤیله دی، کئی بخت قارا موش لار،
ای غم دنیایه اولان توش لار،
گوشۀ طاعتدی مقامیم منیم،
کنج قناعتدی مقامیم منیم؛
صورت حالیمی او خالق بیلیر،
هر گئجه گؤی دن منه روزی گلیر.
یوخدو سیزین نانووزا حاجتیم،
حق اؤزو آماده ائدیب قسمتیم.
چوخ گئجه‌لر قالمیش ایدیم آج من،
صبحه کیمی لقمه یه محتاج من.
صبر ائله‌دیم آجلیغا، آخر خدا
قیلدی منه رزق فراوان عطا.
کنج عبادت نه گؤزه ل جای ایمیش،
ترک جاهان دولت دنیا ایمیش.
اول کی گؤره روزی حق لذتین،
نئیلییر آخر او سیچانین اتین؟!
سیز گئدین، آسوده اولون صبح وشام،
گوشت سیچان گوربه یه اولموش حرام.
سیز داخی آنبارلری سؤکمه یین،
سالم اولون، روزی غمین چکمه یین.
من تک ائدین طاعت حقه قیام،
گؤندری خالق سیزه گؤی دن طعام.
ایندی گلین، جمله اؤپون اللریم،
ای چمن نازده سنبل لریم.
چون بو نصیحت لری گوش ائتدی لر،
خوفه دوشوب جوش و خروش ائتدی لر.
بید کیمی جمله سی لرزان اولوب،
هر بیری بیر صورت بیجان اولوب،
گلدی لر اؤپسون لر اونون دستینی،
آچدی سیچانلارا پیشیک شستینی.
بئش سیچانی ائیله‌دی ظالم شکار،
ظلم و جفا اولدی یئنه آشکار.
هر الینه ایکی سیچان مبتلا،
بیر سیچانی آغزینا آلدی حلا.
ایکی سیچان قاچدی، قوتاردی باشین،
سیل کیمی جاری ائدیب گؤز یاشین.