یئردکی لرین گؤیه شکایتی

یئردکی لرین گؤیه شکایتی

بیر زامان توتدی ظلم دنیانی،
اوجالیر خلقین عرشه افغانی.
هرج و مرج اولدی دار ملک جاهان،
دهرده قتل و غارت اولدی عیان.
ییغیشیب خلق ائتدی لر شورا،
گؤیه گئتسین گرک نئچه دانا،
ائیله سین لر شکایت اللهه،
چاره قیلسین بو قوم گمراهه.
انتخاب ائتدی لر نئچه زاهد،
پاکدامان و مرشد و عابد.
چیخیب عرشه شکایت ائتسین لر،
بیر سرانجام آلیب غایت سینلار.
اون نفر مرد فیض اکرم ایله،
چیخیبان عرشه “اسم اعظم” ایله،
گؤردولر کی، خدای عرش سریر
آغاریب ساققالی، اولوبدور پیر.
ائدیبن تکیه استراحتله،
اوزانیب عرش اوسته راحتله.
ائتدی لر عرض، کئی خدای جاهان،
قتل و غارت اولوب چاهاندا عیان.
دئدی لر یوخدو استراحتیمیز،
قالماییب شوکت ایله عزتیمیز.
عزتین حقی ائیله بیر چاره،
اولموشوق جمله میز گونو قاره.
دئدی:– من خیلی چکمیشم زحمت،
ائتمیشم سیزلری هامی خلقت.
قوجالب ایندی اولموشام من پیر،
داخی عالمده بیلمیرم تدبیر.
یاتمیشام بوردا استراحت ایله
بیر نئچه وقت لردو راحت ایله.
وئرمیشم بو جاهانی عیسی یه،
اوغلوم، اول روح بخش والایه.
گئدین، عیسی یه عرض حال قیلین،
بو غمین چاره سین سئوال قیلین.
گلیبن اول گروه روحانی،
چرخ چارومده تاپدی عیسی نی.
ائتدی لر جمله ماجرانی بیان،
درد پنهانه ایسته‌ییب درمان.
دئدی عیسی کی، ای گروه دغا،
یوخدو سیزلرده ذره قدری حیا.
گلمیش ایدیم نجات ایچون دهره،
کایناته، حیات ایچون دهره.
گه منی مصره قیلدیز آواره،
گاه چکدیز توتوب منی داره.
گؤزونو قویدوز آنامین گریان،
اولدی رخساره اشکی دانه فشان.
خالام اوغلو، او پاک یحیی نی،
اؤلدوروب تشته تؤکدوز آل قانی.
زکریانی ائتدیز آواره،
ارّه ایله وجودینی پاره.
قویمادیز بئش گون استراحت ائده ک،
راه حقه سیزی هدایت ائده ک.
قویمادیز حق یئتیشسین اثباته،
عاقبت قاچمیشام سماواته.
ایستییرسیز گلم او دنیایه –
کی، دوشم تازه دن غم و وایه؟
یاخا سیز محنت ایله ناره منی،
چکه سیز تا دوباره داره منی؟
بو خیالات دان دوشون، هیهات!
زاتوووز چون منه اولوب اثبات.
یعنی من بیرده خاک دانه گلم،
قویوبان گؤی لری، جاهانه گلم؟
جانووز چیخسین، ای اوزو قاره،
باشووزچون گئدین قیلین چاره.