منو
سلیمان و قارغا
سلیمان و قارغا
بئله نقل ائتدی راویان کلام –
کی، سلیمان نبی علیه سلام.
دئدی کیم، بیر کلاغه ائیله گذر،
جمله نسل طیوره ائیله نظر،
هانسی کی، حسنده اولا زیبا،
گؤتوروب گل حضوروما حالا.
بیشه یه اول کلاغ قیلدی گذر،
ائتدی نسل طیوره جمله نظر.
نظرینده گؤروندو پستئو بلند،
ائتمهدی هیچ بیر گروهی پسند.
اؤز بالاسینا گلدی قیلدی نظر،
ائیلهدی باطنی محبت اثر.
دئدی کی، جمله دن بو زیبا دیر،
بس بونو تحفه ائتمک اولا دیر. .
گؤتوروب دوشدی عزم جولانه،
گتیریب خدمت سلیمانه.
چون سلیمان او زشته قیلدی نظر،
دئدی کیم، ای کلاغ بد منظر،
یوخدو قوشلار ایچینده بوندان زشت،
چوخ کریه الجمال و شوم و درشت.
انکسارایله عرض قیلدی کلاغ،
دئدی کی، هر طرفه چالدیم آیاق،
ائیلهدیم جملۀ طیوره نظر،
اؤز بالامدان بیری دئیل بهتر.
بوندا شک یوخدور، ای رسول خدا،
هر کسه اؤز بالاسیدیر زیبا.
سیّدا، اوغلون اولسا کور و کچل،
گؤرونور هامی دان گؤزونده گؤزه ل.
“کُلُّ حزبن بما لیدهی”* اوخو –
کی، بو معنایه دیر اشاره چوخو.
——————————————————-
* هر فرقه [طایفه] اؤزونین کونه [اؤز عملینه] فرحلنر (آیه)