مجنونون احوالاتی

بیر نفر شخص گؤردو مجنونی
اول اسیر بلا و دل خونی.
بیر قوتور ایت آلیب قوجاغینه،
دمبدم باش قویور آیاغینه،
گاه اؤپر اول ایتین آیاغیندان،
گاه اؤپر شوق ایله دوداغیندان،
دئییر:– ای پاسبان کوی حبیب،
درد پنهانیما بو گونده طبیب.
ای اولوم بو آیاغوا قربان –
کی، دییب کوی یاریما هر آن!
ای اولوم گؤزه‌لرین نگهبانی –
کی، گؤروبدور جمال لیلانی!
بیر نولا، ای نجیب دور و زامان،
صوت جانبخشوه اولوم قربان!
توک لرین مثل عود و عنبردیر،
دیش لرین عقد دُرّ و گوهردیر.
سن تک آهوسو یوخدو رضوانین،
سگ اصحاب کهف قربانین.
دئدی لر:– ای سفیه و لایلعم،
ایته بو قدر یالوارار آدم؟
چکدی مجنون بیر جیردن آه،
اوج عرشه اوچالدی دود سیاه.
دئدی:– چوخ کیمسه دن بو اعلا دیر –
کی، سگ آستان لیلا دیر.
گؤر کی، بیر بو نه اعتبارده دیر،
گئجه‌لر آستان یارده دیر.
بئله ایت من اؤزوم اولایدیم کاش،
نقشیمی ایت چکیدی اول نقاش.
فرقی واردیر منیمله، ای شیدا،
من بونا سگ، بودور سگ لیلا.