ائششک و آریلار

ائششک و آریلار

بیر نئچه کندو گؤردو بیر ائششک،
آریلار اوندا ایشلییر بی شک.
گؤردو بیر خانۀ مقدس وار،
بیت شش گوشه ایچره چوخ کس وار.
پادشاهین حضورونا گئتدی،
شاه یسوبدن سئوال ائتدی.
دئدی:– بو کندوده ندیر مقصود
ساز اولور گونده نای و بربط و عود؟
سیزه حاصل ندیر بو غوغادن؟
واقف ائیله منی بو معنادن.
دئدی:– بیز سبزه یه اولوب چیره،
ائدریک جمع کندییه شیره.
دئدی ائششک کی، یعنی شیره ندیر؟
اولموسوز سبزی اوزره “چیره” ندیر؟
بیر قدر بال دادیزدیلار ائششگه،
یئدی ائششک چو بالی، دوشدی شکه.
دوشدی بیر فکره ائششگ نادان
تا گئدیب اوتلاسین اودا قالقان،
گلیبن چکسین آری تک شیره،
کؤنلونو وئردی فکر و تدبیره.
یئدی قالغانی، گلدی سالدی پئیین –
کی، ایگیندن توتولدو باش و بئیین.
اییله دی، داددی، گؤردو بال دئیل،
یئدیگی باله بو مثال دئیل.
کندییه گلدی وردو بیر شیللاق،
آریلاری داغیتدی اول سارساق.
گؤردو بیر آیری آری بو حالی،
آریلاردان سوروشدو احوالی،
دئدی:– کشف ائیله، نه بلا دیر بو،
نه مصیبت، نه ماجرا دیر بو؟
دئدی بیر آری آرییا:– آری،
بیز بو یولدا ایتیرمیشیک آری.
ائششه یه بال دادیزمیشیق غافل،
اولموشوق فضل و عقل دن جاهل.
بو غم و درده مبتلا اولدیق،
صاحب محنت و بلا اولدیق.
ائششه یه بس دادیزدیرسا هر کس بال،
داغیلیر خانه سی اونون بو مثال.
سیّدا، علمی آچما نادانه –
کی، دوشرسن جاهاندا نقصانه.
چکمه کالای شعری بازاره،
گوهری عرض ائله خریداره.
نه بیلیر دُرّ قدرینی علاف،
یوخدو بازار دهرده صراف.