بد سسلی مؤذن

بیر مؤذن فضای صحراده
اوجا صوت ایله گلدی فریاده.
صوت مکروه ایله وئریردی اذان،
یوگوروب هر طرف اولوردو روان.
دوروب اؤز صوتینه آسیردی قولاق،
ائشیده تا کی صوتین اول سارساق.
بیر نفر شخص گؤردو بو حالی،
ایسته‌دی حال دن اولا حالی،
دئدی:– ای خوشترانۀ دوران،
بلبل و قمری تک ائدن الحان،
بیر بیان ائیله بو نه حالت دیر،
منه کشف ایله، بو نه حکمت دیر؟
نیه بو دشتده وئریرسن اذان،
نه اولورسان او یان، بو یانه روان؟
دئدی کی، خلق ائدیر منه اعزاز(منی عزیز ساخلیر)،
منده دئرلر کی، وار گؤزه ل آواز.
قاچیرام برک آزان وئریب هر یان،
تا اوزاقدان گؤروم صدامی عیان.
تا بیلیم منده وارمی خوش آواز،
لحن داوده ائیله ییم من ناز.
سیّدا، بؤیله دیر حقیقت کار،
اؤزونه خوش گلیر صدای حمار.
اؤزوی خوشترانه ائتمه حساب،
ائتمه سین خنده تا اولول الباب.