اوغلوما نصیحت

اوغلوما نصیحت

ای اوغول، عالم اولسا خوش طینت
مال دنیایه ائیله مز رغبت.
دئییب اول پادشاه ارض و سما
حب دنیادی رأس کلّ خطا.
چون حلالی حساب دیر مالین،
هم حرامی عذاب دیر مالین.
نه گرک دیر سنه بو دولت و مال
یوکوو یونگل ائیله، ای حمال.
ای اوغول، وار جاهاندا چوخ موللا،
گذرانی ایچون ائدر غوغا.
غیرت ملتی بهانه قیلار،
گونده خلق ایچره یوز فسانه قیلار.
اهل دنیایه ائیلیر لعنت،
اؤزو دنیایه ائیلیر رغبت.
دایما اغنیایه دیر میل،
اهل فضلین اولوبدو سرخیلی.
فقرانی گؤرنده نفرت ائدر،
اونا بیکارلیقدا تهمت ائدر.
اغنیا گلسه بزمینه، او زامان
گل حمرا کیمی اولور خندان.
بیر غنی ائیله سه اگر عصیان،
ساز ائدر صحبتینده یوز برهان.
فی المثل بیر غنی گر ایچسه شراب،
اونا تجویز ایچون آچار مین باب.
گؤرسه کیم، بیر فقیر ائدیر عصیان،
لعن ائدر اول فقیر ایچون هر آن.
اؤزونین حددن اؤتدو عصیانی،
مهو ائدیب دیر فسون و شیطانی.
دئیه سن اول سفیهه، ای خنّاس
اوخودونمو “اتمرون الناس”*.
ایلییرسن مذمت هر کس،
نیه اؤز نفسوی اونوتدون بس؟
عالم اؤز علمینه ائدیدی عمل،
دوشمز ایدی بو قدر دینه خلل.
رسم دیر عالیم اولسا اهل فساد،
عالمی اول فساد ائدر برباد.
اویما موللایه، اولما چوخ دا عوام،
سانما تحت الحنک، قوروبدور دام.
باخما تسبیحه، اولما دیوانه،
خام اولان قوشلارا گرک دانه.
سانما آلنیندا سجده دن دیر اثر،
گئجه قویموش هجامت اول کافر.
خاتمیندن دئمه سلیمان دیر،
دیو دیر اول لعین، شیطان دیر.
آه، آه، ای جناب پیغمبر!
دینوی ضایع ائتدی بو کافر.
ائیله‌ییب شرعوی وسیلۀ نان،
بو شریر و لعین و بی ایمان!
وقت دیر، ائیله چاره اسلامه،
تازه دن سال ایشی سرانجامه.
جور و ظلم ایله دولدو ملک جاهان،
عدل و قسط ایله ائیله بیر سامان.
قیل هدایتله عالمی آباد،
هانی بس اول “لِکلِ قومون هاد”* *.
————————————————————
* خالقی یاخشیلیغا دعوت ائدیب، اؤزونیزو اونودورسونوز (آیه)
** الله بوتون قوم لره [طایفه لارا] یول گؤسترن دیر