خان و دهقان

خان و دهقان

بیر اکینچی گئدیردی مستانه،
یولدا اول راست گلدی بیر خانه.
خانی گؤرجک یازیق باش ائندیردی،
گؤر اونی خان نه گونه دیندیردی،
دئدی:– ای ایت، کناره چیخ یول دان!
نه چیخیرسان دونوز کیمی کول دان؟
گؤردو بو التفاتی چون خاندان،
ذوقدن اولدی گول کیمی خندان.
ائوینه داخل اولدی خرم و شاد،
عورتی اوندا گؤردو وجد زیاد.
دئدی:– ای قاشی بیر هلال مبین،
خرمنین اوسته خوشه چین پروین،
مزرعۀ امتزاجه دانه فشان،
سنبله شکلی سنبلوندن عیان.
ندی بو بهجت و سروره سبب،
تئز بیان ائت گؤروم ندیر مطلب؟
دئدی بی لر یانیندا خان کوبار
یول دان اکرام ایله ائدیردی گذار.
دایانیب خانه ائیله‌دیم کورنوش،
منی دیندیردی خان صاحب هوش.
دئدی:– بو اولماز ای بلند اختر،
سنی خان دیندیره، ائدیم باور؟
نه دئییب خان سنه، بیان ائیله،
درج لعل آچ، گوهر فشان ائیله.
آتیلیب دوشدی بیر زامان دهقان،
هوسی ساکت اولدی، قیلدی بیان.
دئدی کی، خان دئدی:– چیخ ایت یول دان!
نه باخرسان دونوز کیمی کول دان؟
بیزه خان التفاتی پیدا دیر،
بیر سعادتدو، فیض عظما دیر.
بیزه بو وجه افتخار اولسون،
نسل به نسل یادگار اولسون.