منو
سیچان و پیشیک
سیچان و پیشیک
وار ایدی بیر شهرده بیر بد پیشیک –
کیم، یوخ ایدی بیر بئله مرتد پیشیک.
موش لره ظلمون ائدیب آشکار،
گون ده ائدردی نئچه موشی شکار.
گلمیش ایدی تنگه سیچانلار هامی،
ائیله‌دی لر دفع غمه انجامی.
جمع اولوبان ائیله‌دی لر مشورت،
گؤردولر آخر بو ایشی مصلحت –
کیم، تاپالار بیر جرس پرصدا،
ائیله یه‌لر چارۀ درد و بلا.
باغلایالار زنگی پیشیک بوینونا،
زنگ ائله یه گوربه گلنده صدا.
گوربه گلن وقت سیچان توتماغا،
زنگین اولا تا کی سسی بر ملا.
قاچیب گیره هره اؤز یواسینا،
دوشمه یه‌لر تا پیشیک بلاسینا.
جمله بو تدبیره دئدی:– مرحبا!
تاپدیلا بیر زنگ قوی، پرصدا،
عرض ائله‌دی تا او زامان بیر سیچان:
ای سیزه قربان اولا بو ناتوان!
ائتدیگینیز یاخشی سرانجام دیر،
کیم دئیه جک پخته دئیل، خام دیر؟
کیم دیر او سیزدن کی، دویا جانینا،
قویا قدم اول پیشیگین یانینا؟!
کیمده او جرات اولو، کیم دیر او کس،
تا پیشیگین بوینونا آسّین جرس؟
قالدی او دم مات و معطل هامی،
بیلمه‌دی لر دفع غمه انجامی.
ائیله‌مه، سیّد، بو صفت فکر خام،
اولما سیچانلار کیمی سن ده عوام.
فکره دوشوب ائتمه خیال محال،
ائتمه قوی چنگ ایله فکر جدال.