منو
همدان حاکمی
همدان حاکمی
گلدی بیر حاکم علوّ مکان،
همدان اؤلکه سینده اولدی عیان –
کی، ائشیتمیشدی اول بلند مکان
بیر نفر شخصی صاحب احسان –
کیم، او شخصین گؤزه ل سخاوتی وار،
سفره سی، لطفی، بذل دولتی وار
صاحب بذل و جود دیر انعام،
فقرایه مدام ائدیر اکرام.
گیئدی بیر کهنه سوب اول سرور،
او سخی نین یانینا گلدی، مگر،
او سخی ائتمه‌دی اونا اکرام،
گؤرمه‌دی بذل و جود و سفره، طعام.
گلدی حاکم ائوینده توتدی قرار،
گؤرمه‌دی اوندا لطف دن آثار.
صبح گیئدی لباس زرتاری،
جامه سین ائتدی رنگ گلناری.
گؤرجک اول شخص ائیله‌دی پیشواز،
الینی توتدو، قیلدی چوخ اعزاز.
خوش صفائیله دی، دعا قیلدی،
مدح لر سؤیله دی، ثنا قیلدی.
دئدی:– قربان سنه بو ائو، بو ائشیک،
من گرک دیر چکم قاپیندا کئشیک.
ائتدی آماده نعمت الوان،
کبک و تئیهو و برۀ بریان.
گؤردو حاکم چون اول سرانجامی
او ضیافت لری، او اکرامی،
گتیریب لقمه لقمه پیوسته
دوزدی الوان لباسی نین اوسته.
دئدی ائو صاحبی:– نه حالت دیر،
توتدوغون عیش خلاف عادت دیر.
دئدی کی، من دونن ده گلمیش ایدیم،
سنی من جود اهلی بیلمیش ایدیم.
گؤرمه‌دیم سنده جوددان آثار،
ایندی گؤردون لباسیمی زرتار.
سن منیم چون ضیافت ائتمه میسن،
یوخ، بو پالتاره حرمت ائیله میسن.
بس یئسین بو قیدالاری بو لباس،
حق اولان سؤزدن ائیله‌مه وسواس.