منجم حاقیندا حکایت

منجم حاقیندا حکایت

بیر گون اولدی سوار شیر خدا،
بیر قضاوت چون اول شه والا.
بیر منجم دچار اولدی سحر،
دئدی:– ای شمس چرخ پراختر،
لله الحمد مرد داناسن،
علم چرخینده شمس بیضاسن.
قطب سن، لشکرین کواکیب دیر،
خیل انجم سپهره راکیب دیر.
سنه اکلیل چرخ تاج وقار،
آستانونده کلب بسته جبار.
سایلین کیم، جاهاندا یوز مین دیر،
هم بیری قصة المساکن دیر.
ای اولان کایناتدن افضل،
جمله رامح لری قیلان ازل.
سن سلیمان سن، پری بو سپاه،
نصر طایردی هودهودون، ای شاه.
سنده دیر ذوق کوکب شیرا –
کی، یئتر قتله سندن آل زنا.
مهر و مشتری سعادت سن،
کوکب چرخ اوج رفعت سن.
ائتمیسن ای امیر جن و بشر،
نه یامان نحس گونده عزم سفر؟
نجم نحسئین ائیله‌ییبدی قیران،
بیری مریخ دیر، بیری کیوان.
دئدی حیدر رسوله، بس دبران
هانسی کوکبله ائیله‌ییبدی قیران؟
شرح قیل بس کی، کوکب شیرا
هانسی منزلده ائیله‌ییب مأوا؟
ائیله اظهار کیم، فلان کوکب
هانسی کوکبله مقتریندی بو شب؟
بو قبیل اول سپهر فضل و کمال
اول منجمدن ائتدی خیلی سئوال.
قالدی حیران منجم دانا،
سؤیله‌دی بیلمیرم من، ای مولا.
سن اؤزون واضع کواکیب سن،
صاحب مدحت و مناقیب سن.
بس او خورشید چرخ فتح و ظفر
وئردی اؤز فتحینی او شخصه خبر.
دئدی:– افواج زمرۀ تاغی –
کی، بیزیمله اولار اولوب یاغی
مردم کوفه دیر، خواریج دیر،
خلقت ذاتی نار مارج دیر.
عددی اونلاریندی دوققوز مین،
جمله سی بد نهاد دیر، بی دین.
اونلارین جمله سی هلاک اولاجاق،
تیغ قهریمله سینه چاک اولاجاق.
هر مینه بیر نفر اولور بیزدن.
قالدی اول مرد مات بو سؤزدن.
نئجه کی، سؤیله‌میشدی شیر خدا
او صفت ماجرا اولوب پیدا.