نصیحت

نصیحت

ای اوغول، سانما اهل علمی ضعیف،
بیل بو علم نجومی علم شریف.
بونو قرآن کی، ائیله مز انکار،
نئچه آیاتدن اولور اظهار.
واردی بیر گون کی، ای دُر یکتا،
سؤیله‌ییب نحس مستمر خدا.
نقل ائدیرلر کی، شاه عرش جناب
دئدی:– “کل منجمون کذاب”*.
بیر خبردیر کی، ای فقیر و زبون،
صدق و کذبه وار احتمالی بونون.
خود توتاق کیم، صحیح دیر بو خبر،
اونا وار لیک معنی دیگر.
دُرّ تأویله اولگیلن غواص،
چونکی هر عامه واردی معنی خاص.
ظن دیر چونکی حکم علم نجوم،
بس دئیل دیر حقیقتی معلوم.
بعضی ایشده منجم ائتسه خطا،
بو دئیل دیر حقیقت عیب اونا.
لیک وار بعضی حکمونون اثری،
مهر و ماهین توتولماغی خبری،
داخی بیر پاره امر و احکامی،
راست دیر یازدیغی سرانجامی.
وار سعد و عطاریدین شرفی،
بیل هوبوت زحلده نحس و خفی،
مشتری باعث سعادت دیر،
زحلین هر ایشی نحوست دیر.
هر نه کیم، خوب و بد اولور حادث،
اونا مریخ اولور همین باعث.
مختصر، هر نه واردی کوکب لر
واردیر هر بیرینده طرفه اثر.
هامی سی اذن کردگارایله
نه کی تأثیر اختیارایله.
بولار اسباب قدرت حق دیر،
شرع ایله هم بو سؤز محقق دیر.
بو شریف علمی حضرت ادریس
خلقه حکمتله ائیله‌ییب تدریس.
بیل کی، میراث انبیا دیر بو،
ای اوغول، علم اولیا دیر بو.
نئجه کیم، بو حکایت، ای ذی فن،
سنه بو مطلبی ائدر روشن.
اولما قول منجمه گمراه،
بیل کی، کیم دیر نجومدن آگاه.
بیل کی، سرخیل اسفیا کیم دیر،
واقف سرّ ماسوا کیم دیر.
——————————–
* بوتون منجم لر یالانچیدیر.