منو
اوغلوما نصیحت
اوغلوما نصیحت
بیلمیش اول، ای نجیب فرزانه،
اولولار بزمیدیر ادب خانه.
بیلمک آدابیدیر سنه واجب،
رسم آدابه اولگیلن راغب.
بی ادب اولسا مجلسه داخل،
اولو معلوم کیم، اودور جاهل.
ادبین رسمیدیر جاواب و خطاب،
بلکه رأی متین و قول ثواب.
حرکتدن اولور ادب معلوم،
قول و گفتاردن اولور مفهوم.
بو رموز بیلیر اولول ابصار،
فکرسیز عاقل ائیله مز گفتار.
ائیله مز، ای یگانۀ دو سرا،
احتیاط ائتمه‌میش عمل دانا.
بیر سئواله اولورسا اول شایق،
وئر اونون سن جاوابینی لایق.
مطلبیندن زیاده وئرمه جاواب،
خواهش ائتسه دئیل بو نقص خطاب.
مجلسه داخل اولسان، ای دانا،
یوخاری باشدائیله‌مه مأوا.
صاحب مجلس ائیله سه اکرام،
سنه وئرسه یوخاری باشدا مقام،
میزبانین چوخ ائیله سه الحاح،
کئچ یوخاری، اگر واریندی سلاح.
گر قولوندان توتوب ائده اکرام،
قیل تواضع له صدر بزمی مقام.
سولوا، ساغوا ائله کورنوش،
ائتمه بیهوده صحبت ایله خروش.
ساکت اول غیری ائیله سه گفتار،
دانشان شخصه ائیله‌مه آزار.
اؤزگه کس گؤردون ائیله یر صحبت،
ساکت اول، ائیله‌مه اونا دقت.
دقت ائتسن سنه عداوت ائدر،
جهل دن اول سنه شماتت ائدر.
چونکی اول کس کی، باشلاییبدی خطاب،
اؤزونی عاقل ائیله‌ییبدی حساب.
سیّدا، عقل اگر اولا معدوم،
کیمسه اؤز جهلین ائیله مز معلوم.