قاز و دورنا

بیر گؤل ایچره اوزوردو بیر یکه قاز،
اؤزونه فخر ائدیب اوزاتدی بوغاز.
دئدی:– من بیر عجیبه جور قوشام،
اوچ هنر وار منده، خیلی خوشام.
اوچارام گؤیده، هم سودا اوزرم،
قورو یئرده بویون چکیب گزرم.
بس منم قوشلارین شهنشاهی.
دورنا اولدی بو نقلین آگاهی.
دئدی:– آخماقلیغیندا یوخدور شک،
قامتین دیر دراز، عقل گؤدک،
گؤیده ترلان تک اوچماغین وارمی،
یا مارال کیمی قاچماغین وارمی؟
بیر بالیق تک اوزرمیسن سوده،
ندی بو گفتگوی بیهوده؟
قاز اوتاندی او گؤلده دورنادن.
واقف اول، ای اوغول، بو معنادن.
یعنی بیر علمه دایم اول طالب،
ذی فن اول ذی فنونه دیر قالیب.
کیشی بیر صنعتی بیلر خالص،
چوخونا میل ائدن قالار ناقص.