سیچانلارین پادشاها شکایت لری
ناله کنان دوشدی یولا موش لار،
صیحه زنان جمله او مدهوش لار.
قطع منازل ائلهییب با فغان،
طی مراحل ائلهییب خون چکان.
گؤردولر کرماندا سیچان شاهینی،
طوف ائلهییب عجز ایله درگاهینی،
ائیلهدی لر عرض کی، ای پادشاه،
شاه جاهان، سرور عالم پناه!
داد الیندن پیشیگین، داد، داد،
گؤرمهمیشیک بیز بو صفت بد نهاد!
وار بیزیم اؤلکه ده بیر بد پیشیک،
دوشمز اله بیر بئله مرتد پیشیک.
گاهی یهود، گاه مسلمان اولور،
گاه دؤنوب عابد دوران اولور.
بوندان ازل کی، نه مسلمان ایدی،
بیر سیچانا قانع دوران ایدی.
ایندی بو ایلدن کی، مسلمان اولوب،
رغبتی چوخ، حرصی فراوان اولوب.
ایندی توتور بیر نفسه بئش سیچان،
گؤرموش ایدیک بیز بئله محنت هاچان؟
قاپوا گلدیک بیزه امداد ائله،
غملی اولان کؤنلومیزو شاد ائله.
ائیله بیزی چنگ پیشیک دن خلاص،
چاکر محض یک سنه، بیر عبد خاص.
درگه اجلاله گتیردیک پناه،
ائیله علاج، ای شه انجم سپاه!