تاجرین آخماقلیغی

تاجرین آخماقلیغی

واردی بیر مرد صاحب رونق،
تاجر ایدی و لیک چوخ احمق.
آچمیش ایدی فروش ایچون دکان،
واردی بیر جفت اوندا انفیه دان –
کی، هامان ظرف لر طلادن ایدی،
نه طلا، زر پربهادن ایدی.
بیر یهودی کی، دزد ایدی، عیار،
روبه نر مثالی حیلت کار.
گلدی دکان آرا او پرحیلت،
سوردو کیم، بونلارا ندیر قیمت؟
دئدی کیم، قیمتین دئییم سنه دوز،
بو بیری یوز مانات دیر، اول ایکی یوز.
او یهودی بو قیمته بیتدی،
یوز ماناتلیق قابی آلیب گئتدی.
کئچدی بو قصه دن نئچه ساعت،
او یهودی یئنه قیلیب رجعت،
ایسته‌دی اوندان اول قالان قابی.
گؤر نه تزویر ائدیر او قلابی؟
دئدی کی، یوز مانات چاتیب سنه دوز،
بودا اؤز قابین، اولدی بو ایکی یوز.
چاتدی چون ایکی یوز مانات بو دم،
اول بیری قابی بس دورائیله کرم.
ساندی یوخدور بو امرده نقصان،
وئردی اول قابی تاجر نادان.
آلدی اوندان یهودی ظرف زری،
ائله گئتدی کی، یوخ هله خبری.