هارون و شاعرلر احوالاتی
گلدی هارون ایچون ایکی شاعر،
هره بیر فرد ائیلهییب ظاهر.
بو ایدی فرد اوّله معنا –
کی، اولور یاخشی فعله یاخشی جزا.
فرد ثانیده هم بو ایدی عیان –
کی، همیشه اولور یامانه یامان.
شاعر اوّله او فخر کبار
مرحمت قیلدی مین عدد دینار.
شاعر ثانییه هم ائتدی عطا
اولین نصفینی، او کان سخا.
اهل بزم اولدی بو ایشه حیران،
دئدی لر:– ای خلیفۀ دوران،
بیردی معناده کیم، بو ایکی کلام،
بس ندن اولدی مختلف انعام؟
دئدی کیم، شخص اولسا خوش طینت،
یاخشیلیقدان مدام ائدر صحبت.
وار ایدی طینتینده چونکی صفا،
یاخشیلیق فردین ائیلهدی او ادا.
اول بیرینده یامانلیق اولدی نهان،
اودو کیم، سؤیلهدی یامانه یامان.
صفت صاحب کلامدی سؤز،
باطن آثارینا تمامدی سؤز.