ساده لوح برمکین احوالاتی

بیر نفر شخص سادۀ برمک
شهردن گلدی آلدی بیر ائششک.
چکدی افسارین، اولدی راهه روان،
ایکی عیار ناگه اولدی عیان.
بیری سی توتدی صحبته آنی،
آچدی یول اوسته نقل طولانی.
بیری ائششک دن آلدی افساری،
باشنا تا کی سالدی افساری.
دوشدی دالینجا آنین اولدی روان،
بو ائله بیلدی کیم، گلیر حیوان.
گلدی اول ائششیی آپاردی روان،
ائیله‌دی بیر طویله ده پنهان.
بیر قدر راه گئتدی اول ساده،
دالینا باخدی بیر او اسناده،
گؤردو کیم، ائششیی اولوب انسان.
بیر زامان قالدی واله و حیران.
دوشدی عیار اونون ایاغینه،
سولونا کئچدی، گاه ساغینه.
عرض قیلدی کی، ای فرشته لقا،
جانیم اولسون قدملروه فدا!
سن نه خوش یُمن شخص والاسن!
خضرسان، یوخسا کیم، مسیحاسن؟
دئدی:– من اوّلی بیر آدم ایدیم،
من ده سن کیمی بیر مکرم ایدیم.
وار ایدی منده بیر حمار خدام،
ایشله دردیم اونی قاپیمدا مدام.
گلسه سودن، گئدردی تئز اودونا،
گونده نوکرلریم دؤیوب بودونا،
گونده یوز یول وراردیلار دَیَنک،
ساغری سی سربسر اولوب دؤینک.
نه طوماری، چولو، نه آرپاسی،
گؤرمه‌ییب آرپا هیچ تورباسی.
گئجه گر گؤرسه گؤیده کاهکشان،
اؤزونه بینوا بیلردی سامان.
گؤرمه‌ییب آخوروندا هرگز جو،
دالی یاغیر، داخی آیاغی جیدو.
بس کی زحمتله دردناک اولدی،
او حمار عاقبت هلاک اولدی.
بو مکافات ایچون جاهاندا خدا
منی ائتمیشدی ائششک، ای آغا.
نئچه ایللردی کیم، بو حالتله
ائششک ایدیم هزار زحمتله.
سن کی، اولدین منیم خریداریم،
سندن اقباله دؤندو ادباریم.
سن کی، آلدین منٍ گونه کاری،
عفو ائدیب دیر گناهیمی تاری.
یئنه لطف ائتدی صورت انسان،
اولدوم انسان، ای فرشته نشان.
سنه من ایندی زرخرید، غلام،
قول دئسن قول، اوغول دئسن اوغولام.
دئدی اول ساده دل کی، ای حیوان،
چون سنی عفو ائدیب خدای جاهان،
یئنه وئردی ازلکی صورتوی،
لطف قیلدی هامان فراستوی.
گئت، سنی من ده ائیله‌دیم آزاد،
ائتمه بیر ائششه یه داخی بیداد.
آلدی افسارینی، رها قیلدی؛
اونا عیار چوخ دعا قیلدی.
دئدی:– یارب، عزیز حرمتینه،
خر احیاسی نین کرامتینه،
گئت، گؤروم حق حضرت عیسی
سنی ائششک سیز ائتمه سین مولا!
اول بیری گون کی، صبح اولدی عیان،
دولوب ائششکله چارسوی جاهان.
یئنه هنگام صبح اول دهقان
ائششک آلماغا اولدی شهره روان.
یئنه شهر ایچره گؤردو اول منوال،
ساتیر اوّل کی ائششیی دللال.
گئدیب اول ائششیین قاباغینه،
دئدی آغزین قویوب قولاغینه:
آدم ایدین دونن کی، سن بی شک،
یئنه اولدین بو گون نچون ائششک؟