سیچان شاهی نین قوشون توپلاماسی

شاه سیچان حکم ائله‌دی لشکره،
زهرایله سو وئردی هامی خنجره.
وئردی سیچان شاهی او گون بویروغو،
نیزه‌لری گوشو قیلیج قویروغو.
توپ و تفنگ ایله او فوج دلیر
جنگ گونو هر بیری بیر نره شیر.
جمله پیشیک جنگینه اولدی روان،
صیحه کنان، نره زنان، خون چکان.
اوچ یوز اوتوز مین، هامی سی موش ایدی،
شاه سیچان رند قدح نوش ایدی.
شه دئدی:– ای تازه جاوانلار، گرک
اول پیشییه ائلچی ازل گؤنده رک.
زیرک و کامل و سخندان اولا،
ائلچی گرک عاقل دوران اولا.
وار ایدی بیر عاقل و زیرک وزیر،
فهم و فراستده قوی، بی نظیر.
قویدو گؤز اوسته الینی اول سیچان،
سؤیله دی:– ای سرور ملک جاهان،
امروه بیر بندۀ فرمان منم،.
وادی عشقینده وئرن جان منم.
درج دهان آچ، بیزه گفتار ائله،
اول لب شیرینی شکربار ائله.
هر نه ایسه حکمون، ایا سرفراز،
من یئتیریم اول پیشییه بی نیاز.
شاه وزیره دئدی:– ای بی نظیر،
سهل دئیل دیر بئله امر خطیر.
گئت پیشییه فاش ائله پیغامیمی،
ائیله بیان جمله سرانجامیمی.
لشکریمین کثرتینی وئر خبر،
جمله زره پوش دور، الده تبر.
عازم اولوب جنگه نئچه پهلوان،
الده هامی خنجر و گرز گران.
یاخشی سی اولدیر کی، گله خدمته،
تا کی اطاعت ائده بو دولته.
یوخسا اونی دهرده خوار ائیلرم،
چشمینه دنیالاری تار ائیلرم.
ائیله‌مه سه پندیمی هرگاه قبول،
چنگیمه گلسین منیم اول بولفضول.