موللا و چوبان احوالاتی

بیر چوبان راست گلدی موللایه،
گؤرجیین دوشدی اؤزگه سودایه.
کسدی اول موللانین قاباغینی،
قوزادی شست ایله چوماغینی،
دئدی:– ای موت و مرگ اسبابی،
اهل تزویرو مرد قلابی،
دلی شیطان دئییر کی، بیر دینک
موللانین زوللا باشنا، زیرک!
دئدی موللا کی، ای چوبان دغل،
دلی شیطان سؤزونه ائتمه عمل.
آدمی اول چیخارتدی جنّتدن،
قیلدی محروم ناز و نعمتدن.
اهل تزویردیر او شوم و لعین،
حق بویوردو:– “لکم عدوی مبینَ”*.
طول غفلتدن اجتناب ائیله،
عقله گل، طاعت ائت، ثواب ائیله!
دئدی:– شیطان یئنه دئییر کی، مانا
ائیله موللایه ایکی قوزو عطا.
چون ائشیتدی قوزو آدین موللا
دئدی:– احسن بو قوله، نامخدا!
گاه بیر باخ سؤزونه شیطانین،
تا کی راحت اولا دل و جانین.
سیّدا، گرچی سن ده موللاسن،
اؤزوو ائتمه بؤیله رسوا سن.
اولما طماع، گئت قناعت قیل،
نفس شیطانوی ملامت قیل.
امتحان خانه دیر سرای سپنج (دنیا)،
بو طلسماتدا نهان دیر گنج.
——————————————–
* (شیطان) سیزین آشکار دشمنینیزدیر (آیه)