هندلی سلیمین حکایتی

بیر نفر اهل کند اولان هندو
قونشوسوندان دیله‌دی تنباکو.
جیبینه ال سالیب او باهمت
بیر اووج ائیله‌دی اونا شفقت.
تنبکی ایچره اولموش عیدی برات،
سهو ایله، بیر عدد سفید مانات.
او بیری صبح گلدی هندی سلیم*
صاحبینه پولو ائده تسلیم.
دئدی کی، سهو اولوبدور، ای آغا،
سن منه پولو ائتمه‌میشدین عطا.
دئدی کی، تنبکی قیلان احسان
پولودا بخش ائدیبدی، ائتمه گمان.
بو خطابی او ائتجیین تقریر،
الینی قویدو کؤکسونه او فقیر،
دئدی:– بو ائوده واردیر ایکی نفر،
بیری سی خیر صاحبی، بیری شر.
صاحب خیر ائتدی حکم قویم –
کی، پولو صاحبینه قیل تسلیم.
صاحب شر سؤیله دی:– ای یار،
ائتمه تسلیم اهلینه زنهار!
بو سنه روزی مقدردیر،
لطف یزدان سنه مقرردیر.
آپاریب وئر شرابه، نوش ائیله،
مست اولوب، کئف چکیب، خروش ائیله.
صبحه دک قیلدیلار بو نوع کلام،
قویمادیلار منی توتام آرام.
قویۀ خیر اولوب شرّه قالیب،
ردینه ائیله‌دی منی راغب.
خوشو گلدی بو سؤزدن، اول آغا
او پولو اول فقیره قیلدی عطا.
سیّدا، دوغرولوق ائله پیشه،
دوغرویا یوخدو بیم و اندیشه.
کؤنلوی پاک قیل خیانتدن،
ایسته رزقین خدای قسمتدن.
——————————-
* پاک، تمیز آدام معناسیندا دیر