گل بیر پیره خیدمت ائیله

گل بیر پیره خیدمت ائیله،
امک ضایع اولماز اولا.
مۆرشید اتگین مؤحکم توت،
کیمسلیندن آلماز اولا.

بیر ایشی بیتیرمک گرک،
اکسیگین یئتیرمک گرک،
یار ایله اوتورماق گرک،
هئچ بیر شمّه گلمز اولا.

بیر سویو سویلاماق گرک،
بیر آجی دویلاماق گرک،
بیر دیلدن سؤیله‌مک گرک،
فیریشته‌لر بیلمز اولا.

غایت چابوق اولماق گرک،
دریالارا دالماق گرک،
بیر گؤهری بولماق گرک،
دگمه صرّاف بولماز اولا.

گئرچک عاشیق اولماق گرک،
معشوقینی بولماق گرک،
اؤلمزدن اؤن اؤلمک گرک،
واریب اوندا اؤلمز اولا.

بیر قوش اولوب اوچماق گرک،
بو معنانی سئچمک گرک،
بیر قدحدن ایچمک گرک،
ایچنلر آییلماز اولا.

بیر باخچایا گلمک گرک،
خوب تفرّوج قؽلماق گرک،
بیر گۆل اله آلماق گرک،
هرگیز  اول گۆل سولماز اولا.

گل، ختایی، سن کئچ اوتور،
دعوانی معنایه یئتور،
صؤحبتینه بیر ار گؤتور.
جانا، باشا قالماز اولا.