بو عالم حۆسنینه حئیراندیر، ائی دوست
بو عالم حۆسنینه حئیراندیر، ائی دوست،
سانا بو قؤنچه لب خنداندیر، ائی دوست.
من اول یعقوب نیسبت زار بولدوم،
جمالین یوسیف-کنعاندیر، ائی دوست.
هیلالی قاشینی تا گؤردو چشمیم.
بو جانیم عیدینه قورباندیر، ائی دوست.
سانا بو کنفکان واله بولوبدور،
کی، حۆسنین صورت-رحماندیر، ائی دوست.
جمالین صفحهسینده خطّ و خالین،
یۆزونده آیت-قرآندیر، ائی دوست.
سنین عشقین وۆجودیم شهدی ایچره
بو کؤنلوم تختینه سولطاندیر، ائی دوست.
خطایییه، دئمیشسن، جؤور ائدیم چوخ،
یئنه لۆطف و یئنه احساندیر، ائی دوست.