ائی جمالین گۆلسیتانی باغ-مینودور مانا
ائی جمالین گۆلسیتانی باغ-مینودور مانا،
جنّت-ریضوان کی، دئرلر، اول سر-کودور مانا.
یۆزون اۆسته زۆلفینی تا گؤردوم، ائی روح-روان،
گئجه-گۆندوز آغلاماق عشقینده خوش خودور مانا.
هیجر سرگردانلیغین چرخ-فلکدن گؤرمنم،
بو جفالرنی قیلان اول یار-مهرودور مانا.
گئجهلر تا صبح اولونجا اویخو گلمز عینیمه،
تا خیالین دایما چشمیمده قارشودور مانا.
آنجا یاش تؤکدی خطایی فیرقتیندن، ائی صنم،
خانجارو باخسام، گؤزومده یئر یۆزو سودور مانا.